محمد جوده ومناهضه الأحكام العسكريه

رساله الي الفارس إسماعيل هنيه

مش زمان فرسان يا صاحبي
الزمان زمن الخيانه
وقفه الميدان يا صاحبي
تفضح الناس الجبانه
طلعتك والنور ف وشك
غايظ الناس المدانه
اللي نهبين الوطن دا
واللي سارقين الخزانه
افتكر مش هيسبوك
ياللي شايلها أمانه


السياسه دي يا صحبي
لف ومنوره وصياعه
انتا فاهمها رجوله
هو فاهمها بياعه
وانتا مش هيغيت رجولتك
اي حد من الجماعه
كلهم سلم سلاحه
اللي جيين واللي راحوا
والوطن مخنوق ف ايدهم
وانتا جاي تطلق صراحو
انتا جاي تلجم غرورهم
بعد ما فاعوا وطاحوا
انتا متحاصر يا فارس
والجراب مليان كوارس
والخيانه ف كل حته
والعرب بيعنها خالص


طهر قلبك مش هيشفع
والعصابه مش هتدفع
شرطها تسلم بلادك للعدو
وتخضع وتركع
وانتا راجل مش هترضي
هما مش رضيين بغير دا
والعصابه جوا سرحه
والجبان حاكمها فردا


والأمل لسا بيسكن كل دار
والعيون لسا بتستنا النهار
إوعي تتنازل وترجع
مش ف إيدك لإختيار
انتا حلم كبير بتتنولو الأيادي
انتا آخر حصن في وجه الأعادي
انتا ميراس الكرامه اللي هيتبقي لولادي
اوعي تتنازل لإن الغدر مستني الساعه دي
راح يقولوا الحق معرفش الطريقه
راح تقوم الدنيا ع الإسلام حريقه
راح تسلم للطوفان أمه غريقه
وانتا يا طوق النجاه
انتا يا رمز الحياه
حتي لو ركع الجناه
انتفض واهتف بلااااااااااااااااااااااااادي

ساره

هي طفله فلسطينيه تبلغ من العمر عامين قُتلت فى الإنتفاضه الثانيه

وهذه رساله من ام "ساره" لها في ليلة العيد
تقول القصيده

وبُكره العيد

وايه العيد بلا بوسه على خدك؟!

و أول مره اشوف بنات الحاره

شايلين فى الشُنط فساتين

ومبتسمين

بلا ساره

وكان نفسي اشوف وردك ف وسطيهم

واشوفك باصه م الشباك

على الناس اللى طالعين من صلاة الفجر بالتكبير

ورايحين ف الخلا يصلو صلاة العيد

وشوش تانيه اللى طالعه من صلاة الفجر

كفوف تانيه اللى بتسلم وبيقولو كلام تانى

ماهُوَّاش كل عام وبخير

قلوب معادتش تعرف غير

تصاوير الأحبه فوق جدار الدار

وخط اسمر بيفصل بين نهار ما الفرحه ف وسطيهم

وليل احزان مغطِّيهم

ومش لاقينن كلام يقولوه

ف بيعزوا ف بعضيهم

وفين انتى

وفين شباكك المفتوح

وفين احلامك الفضه

وفين ضحكة شفايف كان بنورها الفجر يتوضا

معادشي

معادشي غير دموع ماليه المكان كله

ونخل بيبكي على طرحُه وعلى ضِلُّه

واعيش إزاى

وأنسي إزاى

وشكل الخوف على عيونك محاصرنى

وشكل الدمع على خدِّك

وشكل الدم ع الفستان

واحزان الفُراق باينه على الشبابيك

وع الجدران

لا ضيّ الشمس ولا ضحك البنات هُوَّه

وحتَّي الضحكه فيها الحزن من جوه

وأصحابك بييجوا يسألوا عنِّك

ويتحايلوا عليا اخرَّجِك للعب وياهم

ف يِسرِي البرد ف الأوصال

واشوف صورتك يا ساره ساكنه فى عيونهم

واشوف لونك على لونهم.. فاحضنهم

ادفى برد قلبي ووحشة الأحضان

وابوس فيهم

وأهديهم

كراريسك واقلامك

فساتينك

واشواقك واحلامك

وبُكره اللى اترسم بيني

وبين اللى انجرح فيكي

نشوفك لابسه فستان الفرح

والحِنَّه ف ايديكي

وبُكره

وبُكره العيد

وانا شايفه بنات الحاره

جايبين ف الشنط فساتين

ومبتسمين

وكنت اتمني أشوف وردك ف وسطيهم


شــ الـجـبـل ــاعــر

النبي زعلان عليكي

الطريق مخنوق ف ايده
والوطن
ساكن حديده
والبنا المهدود عاوزله جنود

عشان تقدر تعيده

والجنود مسجونه في السجن العتيق

والطريق..

الطريق مخنوق ف إيده

وإحنا مش عارفين نروح

ناس بتتطوح ووخدا أمتى من ضيق لضيق

والطريق

الطريق كان النبي

لما النبي كان الإمام

لمل وقفت أمه الإسلام

ورا خير الأنام

عزِّت الأمه وسادت

حكمت الدنيا وقادت

واما نسيت شرعها

ذلت وخابت

بصي ف إديكي يا أمة

شوفي مين ماسك إديكي

ماسه ليه ف إدين عدوك

واللي خانك

واللي باعك

وللي غمّالك عنيكي

إنتي زعلانه على شتم النبي؟؟

د النبي زعلاااان عليكي

مادد العدنان كفوفه

والصحابه

مدي يا أمه إديكي

هاجرى يا أمه تلاقي

خطوة الصديق قصادك

خطوة الصديق وراكي

قوة الصديق معاكي

كله يا أمه فداكي

واقفي يا أمه تلاقي

ألف خالد في الميدان

ألف سيف لله

وألف بلال بيرفعلك أدان

قوتك منك وليكي

ماسكه ليه ف إيدين عدوك

واللي خانك

واللي باعك

واللي غمالك عينيكي

انتى زعلانه علي شتم النبي؟؟

د النبي.. زعلاااان عليكي

عاوز الفاروق يفرق

بين خلاف الدين

وبين الكره والحقد الدفين

شيعي سُنِّي

شافعي مالكي

ولا إخوان ولا سلفي

دينَّا واحد

شرعنا ورسولنا واحد

ليه منتوحدش احنا؟

واحنا من محنه ل محنه

ستكم أسماء بتبكي لسه علي قتل الزبير

والحسين

ياه علي الحقد اللي جرَّأ ناس

علي ابن الأكرمين

ابن بنتك يا نبي

ياه علي الحقد اللعين

ياه علي الكره الغبي

والنهارده..

جاي حاقد أجنبي

يرمي في ميتنا طوبُه

لجل ما يعكَّر وطنَّا

من شماله ومن جنوبه

واللي خانقين الطريق

لسه مش عايزين يتوبوا

واحنا مش عارفين نروح

للي طهَّرنا وروانا

للي حررنا ونورونا وهدانا

احنا تايهين في المدن

وانتي بتمدي الخطاوي للي باعك

والنبي الهادي شاريكي

ماسكه ليه ف ايدين عدوك

واللي خانك

واللي باعك

واللي غمالك عينيكي

انتي زعلانه علي شتم النبي؟؟

د النبي.. زعلااااان عليكي

شاعر الجبل

خطّي

>خطوه وتبقى هناك ملاك
لحظه وتنفك الشٍباك و تطير
ياللى إنتا فى وسط السطور الهس زعقه
ياللى إنتا فى وسط الوشوش اللى إنطبع ع الارض منظرها
فارد عيونك للسما
دق السما دقه
ياللى إنتا شايف جنتك خطى الأرض بتبوس خطوتك
~~~~~~~~~~~~~~~
يا مجمعنكم من هنا وهناك
يا واقفين طول عمركم ع الباب
متغمى شايف أرضكم مجروحة ف سرير الجبان
يا مفتحين
بصوا من الخرم اللى طول عمرة ملوش مفتاح

شوفوا الجراح
يا مرعوبين من كل مولود ف الضلام
يا معشرين م السكات يا مطبعين ع اللجام
لو تحبلوا واحد كلام
رح تبقوا شئ يا ألف صفر.... واحد
يا واخد قوتك من قوة الواحد
ياللى إنتا فى وسط الميدان عود قمح واقف ف الغيطان
أخضر كما عود السريس
والدرس للنيمين على ودانهم
مستنين يوم الدريس أفتح عيونك يا عريس
الحور عوانس ف السما
مستنين يوم الخميس زى البنات
فافتح إديك للأمنيات
خطوه لعرس الأنظمه
لحظه وتنفك الشباك وتطير
يالىإنتا شايف جنتك خطّى
الأرض بتبوس خطوتك

كان لازم تموت

القبر قال للى شايلين الشهيد هاتوا
اللى كتب ع الوطن أغلى تحياته
وروحوا لا تبكوه
وإتغنوا بحياته
وإبقوا إكتبوا ع القبر عاش الشهيد
وإبقوا إكتبوا بعد الشهيد
كل البشر
ماااااتـــوا
~~~~~~~~
ميكفنيش فيك الكلام إللى إنخلق
ميكفيش فيك المداد
ميكفنيش فيك الورق
يااللى رسمت الحب فوق كل القلوب
وقضيت على الخوف والقلق
يااللى زرعت الخير على كل الوجوه
متشكرين خيرك سبق أبكى على موتك شهيد
والا أبكى قلبى إللى إنحرق
~~~~~~
ُأمّى
بتسأل ليه البكى ليه الندامه
قولتلها فوق أرض الكرم شجر الكرامه
قولتلها أستاذ الشهامه
قولتلها كان للمؤمنين رمز وعلامه
قولتلها نظره من عينيه تمحي العتامه
قولتلها كان ضل الشجر.. كان الابتسامه
قالتلي قول ع الدنيا من بعده السلامه
روح وابكي يا ولدي وما يكفِّيك بكا ليوم القيامه
~~~~~~
صدقني.. كان لازم تموت
لما تموت الكلمه فوق صدر الشفايف
لما اللسان ف العتمه يبكي ويرتعش
بين السنان مسجون وخايف
لما شريعة المظلومين تبقي السكوت
يبقي انت كان لازم تموت
~~~~~~
لما تموت النسمه فوق ضهر العصاري
لما تموت البسمه فوق كل البيوت
لما تزول الرسمه من فوق المناظر
لما يزول اللون
لما تزول كل الخطوط
لما تقيد نفسك مناره للسفن
وتتوه ومتجيش للشطوط
يبقى انت كان لازم تموت
~~~~~~
و لإن رنة خطوتك
طالعه متعرفش الهبوط
و لإن دايما كلمتك
راقيه متعرفش السقوط
و لإن دايما قوتك
شايله.. متعرفش الحطوط
و لإنك انتا مش هتمشي ع اللوايح والشروط
يبقى ربك كان رايدلك رحمته
يبقى ربك كان رايدلك جنته
يبقي موت
يبقى فوت الدنييا
فــوووووووووت
~~~~~~



شاعر الجبل

هنتكلم

محررناش..

لكن قولنا

محررناش.. لكن جينا

وحبينا وصلينا وناجينا

وكان الحلم ف قلوبنا نحررها

وبإيدينا..محررناش
لكن بكره اللى جاى بيقوله تتحرر

أكيد الناس هيجي اليوم وتتغير
وأتمني يكون بالكلمه مش بالسيف

صحيح اليأس أحيانا بيندهنا

يا ناس العتمه مجنونه

لكن بالصدق هنكمل

مادام الكلمه مسنونه

هتقطع فى ضلام الليل

وتجرح قلبه جيل ورا جيل
هنتكلم..

ونملا الدنيا بالأشعار

وتقف الكلمه في الميدان

وتضرب وسط ضرب النار
هنتكلم..

بيتألم جدار الظلم من صوتك

بيتصدَّع هنتكلم.. وهنبدَّع
هنرسمله الكلام أحلام

علي الحيطان هنعزفله الكلام أنغام

ونعمله الرصاص ألحان

هنبني بالكلام مدني

ونعمل بالكلام أهرام
وخليه يحرق الكراس

وخليه يحبس الأنفاس

وخليه يحصد الحلم اللي طارح في عيون الناس

هيفضل صبرنا يكبر

وشوف مين اللي هيسلِّم

هـــنــــتــــكـــلـــم

هــنــتــكــلــم

هـنـتـكـلـم